मराठीसह बॉलिवूडला भुरळ पडावी असे पराक्रमी शौर्यधुरंधर अखंड महाराष्ट्राचे दैवत असणारे छत्रपती शिवाजी महाराज यांच्या आयुष्यावर व त्यांच्या मावळ्यांच्या पराक्रमावर आधारलेले अनेक चित्रपट आजवर प्रेक्षकांच्या भेटीला आले. तानाजी मालुसरे यांच्यावरील 'तानाजी : द अनसंग वॉरिअर' या चित्रपटाने बॉलिवूडला वेड लावलं. आता त्यापलीकडे जात स्वराज्याचे धाकले धनी छत्रपती संभाजी महाराज' यांच्या आयुष्यावर आधारित एक मोठा चित्रपट प्रेक्षकांच्या भेटीला येत आहे. लोकप्रिय बॉलिवूड दिग्दर्शक लक्ष्मण उतेकर हे लवकरच शंभूराजांच्या पराक्रमावर त्यांच्या त्यागावर आधारित चित्रपट घेऊन येणार आहेत. महत्वाचं म्हणजे या चित्रपटात बॉलिवूड अभिनेता विकी कौशल छत्रपती संभाजी महाराजांची भूमिका साकारताना दिसणार आहे.

'उरी' चित्रपटानंतर विकी कौशल हा उतेकरांची या भूमिकेसाठी पहिली पसंती होती. त्यांनी सर्वप्रथम त्यालाच या भूमिकेसाठी विचारणा केली. काही काळानंतर अखेर विकीने या भूमिकेसाठी होकार दिला. ही भूमिका म्हणजे प्रचंड मोठी जबाबदारी असल्याची भावना असल्याने या प्रोजेक्टसाठी तो देखील उत्साही आहे. बॉलिवूड अभिनेत्री सारा अली खान चित्रपटात महाराणी येसूबाईंची भूमिका साकारणार असल्याचं म्हटलं जातंय. आता या प्रोजेक्टसाठी उतेकर यांनी काम सुरू केलं आहे. चित्रपटाची कथा लिहून तयार आहे आणि चित्रपटाचं प्री प्रोडक्शन सुरू झालं आहे. लवकरच चित्रपटाचं चित्रीकरण सुरू होईल.

'मिमी' आणि 'लुका छुपी' नंतर उतेकर आता नव्या अध्यायाची सुरुवात करत आहेत. त्यांनी बॉलिवूडमध्ये आपलं वेगळं स्थान निर्माण केलं आहे. आता या चित्रपटाच्या रूपात त्यांनी मोठं शिवधनुष्य पेललं आहे. हा एक बिग बजेट चित्रपट असणार आह. त्यासाठी ते मागील 6 महिने या प्रोजेक्टवर काम करत आहेत. ते दिनेश विजन यांच्यासोबत मिळून या चित्रपटाची निर्मिती करणार आहेत. चित्रपटाचं नाव अजून गुलदस्त्यात असलं तरी प्रेक्षक या चित्रपटासाठी उत्सुक आहेत. छत्रपतींच्या छाव्याच्या आयुष्यावर आधारलेला चित्रपट पाहण्यासाठी प्रेक्षक आतुर झाले आहेत. लवकरच या चित्रपटाच्या नावाची घोषणा करण्यात येणार आहे.