बेळगाव—belgavkar : बेळगाव येथील प्रतिष्ठीत विश्वेश्वरय्या तांत्रिक विद्यापीठाच्या (व्हीटीयू) ज्ञानसंगम कॅम्पसमधील विद्यार्थ्यांना आहार पुरवठा करणाऱ्या मेसच्या चालकाला 3 जणांनी 30 लाखांना गंडा घातल्याचा प्रकार घडला आहे. बी. सच्चिदानंद शेट्टी असे चालकाचे नाव असून याप्रकरणाची नोंद मंगळूरच्या सेन पोलिस ठाण्यात झाली आहे.
व्हीटीयूच्या ज्ञानसंगम कॅम्पसमधील विद्यार्थ्यांना 2022 मध्ये 1 जानेवारी ते 31 डिसेंबर या वर्षभरात आहार पुरवठा करण्याचा ठेका बी. सच्चिदानंद शेट्टी यांनी घेतला होता. श्री. शेट्टी यांनी या कामाची जबाबदारी व्यवस्थापकाकडे सोपविली होती. व्यवस्थापकाने मदतीसाठी अकाउंट व सहाय्यकाची नेमणूक केली होती. विद्यार्थ्यांकडून आहाराचे बिल मिळवावे, अशी विद्यापीठाने सूचना केल्यानंतर व्यवस्थापक, अकौन्टट व सहाय्यकाने मंजूर बिल मेस चालक शेट्टी यांच्या बँक खात्यावर जमा न करता स्वतःच्या खात्यावर जमा करून घेतले. याशिवाय मेसमध्ये काम करणाऱ्या कामगारांचे वेतन दिले नाही. मेसचालकच्या संस्थेच्या नावे आहार साहित्य खरेदी करून बिल अदा न करता उधारी ठेवले आहे. शेट्टी यांना हे कळाल्यानंतर त्यांनी पोलिसांत फिर्याद दिली.
