कर्नाटक राज्यातील समाजकल्याण मंत्री एच सी महादेवप्पा यांचा एक व्हिडिओ व्हायरल झालाय. या व्हिडिओमध्ये धारवाड जिल्ह्यातील एका वसतीगृहाची पाहणी करायला आलेल्या मंत्री साहेबांनी आपल्या सुरक्षा रक्षकाकडून बूट घालून घेतल्याचं दिसत आहे. या व्हिडिओवरून काँग्रेसवर भाजपकडून जोरदार टीका केली जात आहे.
वसतीगृहाची पाहणी केल्यानंतर बाहेर पडत असताना मंत्री साहेब बूट घालत होते. त्यांच्या सुरक्षा रक्षकाने त्यांना बूट घालून दिल्याचं या व्हिडिओमध्ये दिसत आहे. दरम्यान या घटनेवरून कर्नाटकातील भाजपने मंत्री आणि काँग्रेस पक्षावर हल्लाबोल केलाय. X या सोशल मीडियाच्या प्लॅटफॉर्मव व्हिडिओ पोस्ट केलाय. “...हायकमांड गुलाम @INCKarnataka सदस्यांनी त्यांच्या सुरक्षारक्षकांना गुलाम बनवलं असल्याचं कॅप्शन भाजपने आपल्या पोस्टला दिलंय. राज्याच्या समाजकल्याण मंत्र्यांनी आपल्या जनतेला ही हमी दिली आहे. असं भाजपने टीका करताना म्हटलंय.
भाजपचे ज्येष्ठ आमदार बसनगौडा पाटील यत्नळ यांनीही समाज कल्याण मंत्र्यावर कटाक्ष टाकत हा मंत्र्याचा 'अहंकार' असल्याचा आरोप केलाय. काँग्रेस शासित कर्नाटकात स्वागत आहे जिथे समाजकल्याण मंत्री श्री महादेवप्पा सुरक्षा कर्मचार्‍यांना बूट घालण्यास सांगत आहे. जेथे वंचितांचा विकास करणे आणि समाजातील सर्व प्रकारची विषमता दूर करणे ही समाजकल्याण मंत्र्यांची जबाबदारी आहे. तेथे हे मंत्री साहेब सुरक्षा कर्मचाऱ्याला बूट घालून देण्यास सांगत असल्याची टीका भाजप नेत्याने केलीय.
या टीकेला मंत्री साहेबांनी उत्तरही दिलंय. माझ्या पायाच्या गुडघ्याचे आणि हिपची शस्त्रक्रिया झालीय. त्यामुळे मला कंबरेतून वाकण्यास त्रास होत होता. त्यामुळे माझ्या सुरक्षा जवानाने मला बूट घालण्यास मदत केली, असं भाजपकडून केल्या जाणाऱ्या टीकेला उत्तर देताना मंत्री महादेवप्पा म्हणाले. यामुळे ज्याने मदत केली त्यावर टीका करताना 'अंहकार आणि सत्तेची नशा' सारखे शब्द वापरणे योग्य नाही, असेही मंत्री म्हणाले. मला ओळखणाऱ्या सर्वांना माहितीये की मी वैयक्तिकरित्या कोणाचं किती आदर करतो. त्यामुळे अशा क्षुल्लक वादांची चिंता करण्याची गरज नाही. मला मदत करणाऱ्या सुरक्षा रक्षकाचे मी आभार मानतो असंही मंत्री उत्तर देताना म्हणाले.
