बेळगाव—belgavkar—belgaum : दड्डी-मोहनगा (ता. हुक्केरी) गावची भावेश्वरी देवीची यात्रा गुरुवार 13 फेब्रुवारी ते शनिवार 15 फेब्रुवारीपर्यंत होणार आहे. भावेश्वरी यात्रोत्सव कमिटी व ग्रामपंचायत सलामवाडीच्या वतीने यात्रेची जय्यत तयारी सुरु आहे.
गुरुवारी 13 रोजी सायंकाळी 6 पासून शुक्रवारी पहाटे 6 पर्यंत शस्त्रइंगळ्या होणार आहेत. शुक्रवार 14 रोजी भर यात्रा होणार आहे. शनिवारी 15 रोजी पालखी सोहळ्याने यात्रेची सांगता होणार आहे. भावेश्वरी देवीच्या यात्रेनिमित्त बेळगाव, खानापूर, हुक्केरी, निपाणी, महाराष्ट्रातील चंदगड, आजरा, गडहिंग्लज तालुक्यातील अनेक भाविक या उत्सवात भक्तिभावाने सहभागी होत असतात. त्यामुळे यात्रेचे नेटके नियोजन ग्राम पंचायत व यात्रोत्सव कमिटीच्या वतीने करण्यात येत आहे.
यात्रा परिसरात ज्या व्यापाऱ्यांना आपली दुकाने लावायाची असतील तर त्यांनी जागेचा कर सलामवाडी ग्रामपंचायत इकडे भरावा, 1993 च्या ग्रामपंचायत कायद्याचे काटेकोर पालन करावे, असे आवाहन ग्रामपंचायतच्या वतीने करण्यात आले आहे.
सलामवाडी ग्राम पंचायत परवानाशिवाय कोणीही दुकान किंवा स्टॉल मांडू नयेत. ग्रामपंचायतीने दिलेल्या जागेपेक्षा जादा जागा व्यापल्यास जादा रक्कम आकारली जाईल, ग्रामपंचायतीची पावती काढल्याशिवाय व पूर्ण रक्कम भरल्याशिवाय कोणतीही दुकान लावण्यास परवाणगी दिली जाणार नाही. घटप्रभा नदीकडील दुकानांनासुद्धा पावती काढावी लागेल, पावती घेतल्याशिवाय बकरी विक्रीला परवाना नाही, असे कळवण्यात आले आहे.
दरवर्षीप्रमाणे परिवहन मंडळाच्या वतीने बेळगाव परिवहन महामंडळ व महाराष्ट्रातील गडहिंग्लज आगारातून विशेष बसची सोय करण्यात आली आहे. ग्राम पंचायतीच्या वतीने पिण्याच्या पाण्याची सोय व वैद्यकीय सेवा सुरळीत करण्यात येणार आहे. यात्रा काळात कोणत्याही कमतरता भासल्यास ग्राम पंचायतीच्यावतीने या समस्या सोडवल्या जातील. यात्रेनिमित्त परगावाहून येणाऱ्या भाविकांच्या दर्शनासाठी रांगा लागतात. त्यासाठी यात्रोत्सव कमिटीच्या वतीने नियोजन करण्यात आलेले आहे, अशी माहिती यात्रोत्सव कमिटी व ग्राम पंचायतीच्या वतीने पत्रकाव्दारे देण्यात आली आहे.
