बेळगाव—belgavkar—belgaum : मायक्रो फायनान्स कंपन्यांकडून वसुलीसाठी दमदाटी सुरुच असून, आता फक्त ₹ 100 रुपयांसाठी चक्क घरी जाऊन वसुली कर्मचाऱ्याने कर्जधारकाला शिवीगाळ केल्याचा प्रकार उघडकीस आला आहे. सौंदत्ती येथे ही घटना घडली आहे.
बसवराज नामक व्यक्तीने मायक्रो फायनान्समधून ₹ 55000 रुपये कर्ज घेतले होते. प्रत्येक आठवड्याला ₹₹₹₹ रुपये रक्कम कर्जधारक भरत होता. कर्जाची संपूर्ण रक्कम भरली होती. केवळ 100 रुपये बाकी होते. आपण दिलेली सर्व कागदपत्रे परत दिल्यानंतर 100 रुपये देऊ, असे त्याने सांगितलेही होते. मात्र प्रथम शंभर रुपये द्या, असे म्हणून वसुली कर्मचाऱ्याने घरासमोरच वादावादी सुरु केली.
केवळ शंभर रुपयेसाठी अशाप्रकारे कर्जदाराला दमदाटी केल्यामुळे तीव्र संताप व्यक्त करण्यात येत आहे. वसुली कर्मचाऱ्यांमुळे अनेकांना मानसिक त्रास झाला. त्यातून अनेकांनी आत्महत्याही केली आहे. याबाबत सरकारने गांभीर्याने दखल घेऊनदेखील अशा घटना घडत आहेत. त्यामुळे सरकारच्या आदेशालाही मायक्रो फायनान्स चालकांनी वाटाण्याच्या अक्षता लावल्या का, असा प्रश्न उपस्थित होत आहे.
