बेळगाव—belgavkar—belgaum : म. ए. समितीचे नेते शुभम शेळके यांच्यावर प्रशासनाकडून दडपशाही करण्यात येत आहे. सीमालढ्यापासून त्यांना अलिप्त करण्याचा कुटील डाव आहे. त्यामुळे, मराठी भाषिकांनी याविरोधात आवाज उठवावा, असे आवाहन युवा समिती सीमाभागचे कार्याध्यक्ष धनंजय पाटील यांनी केले आहे.
QR Code डाउनलोड करा आणि पेमेंट करा
Download QR Code
गेल्या दीड महिन्यांपासून प्रशासन शेळके यांच्यावर विविध गुन्हे दाखल करत आहे. दरम्यानच्या काळात त्यांना एकदा अटक केली असून दोनवेळा जामीन मिळाला आहे. मराठी भाषेसाठी लढणाऱ्या शेळकेंवर दडपशाही करण्यात येत असून त्यांना लढ्यापासून अलिप्त करण्याचा कुटील डाव आहे. त्यामुळे या घटनेचा आम्ही निषेध नोंदवत आहोत. सीमाभागातील मराठी भाषिकांनीही आपापल्या ठिकाणी या घटनेविरोधात आवाज उठवावा, असे आवाहन त्यांनी केले आहे.
सीमाभागातील मराठी भाषिक मातृभाषेसाठी गेली 70 वर्षे लढा देत आहेत. म. ए. युवा समितीचे अध्यक्ष शुभम शेळके मातृभाषेसाठीच लढा देत आहेत. तरीसुद्धा त्यांच्यावर अन्यायकारक गुन्हे दाखल करुन आता हद्दपारीच्या प्रस्तावाची नोटीस बजावली आहे. लोकशाहीचा गळाच घोटण्याच्या पोलिसांच्या या कृतीचा सीमाभागाबरोबरच महाराष्ट्रातून संताप व्यक्त होत आहे. सीमालढ्यात सक्रिय असलेल्या शेळके यांनी मराठी भाषिकांवर होणाऱ्या अन्यायाविरोधात नेहमीच आवाज उठविला आहे. त्यामुळे, त्यांच्यावर माळमारुती, मार्केट, कॅम्प आदी पोलिस ठाण्यांमध्ये 8+ गुन्हे दाखल आहेत.
आता माळमारुती पोलिसांनी शेळके यांना हद्दपारीच्या प्रस्तावाची नोटीस पाठविली असून बुधवारी (दि. 2 एप्रिल) पोलिस आयुक्तांसमोर हजर राहण्याची सूचना केली आहे. या नोटिशीमुळे सीमाभागामध्ये खळबळ उडाली आहे. शेळके यांनी कोणत्याही प्रकारचा गुन्हा केला नाही. केवळ आपल्या मातृभाषेसाठी कायद्याच्या चौकटीत राहून आवाज उठविला आहे. हे चुकीचे असेल तर घटनेने दिलेले अधिकार हे केवळ नावापुरते आहेत का, असा सवाल उपस्थित होत आहे. यावेळी सरचिटणीस मनोहर हंदरे, खजिनदार शिवाजी मंडोळकर, उपाध्यक्ष प्रवीण रेडेकर, विजय जाधव, नारायण मुचंडीकर, सागर कणबरकर, इंद्रजीत धामणेकर, राजू पाटील, संभाजी कणबरकर, सूरज जाधव, रामनाथ मुचंडीकर आदी उपस्थित होते.
