धार्मिक कार्यक्रमांसह बुधवारी मराठमोळ्या लावणीचा रंगतदार कार्यक्रमबेळगाव—belgavkar—belgaum
खानापूर : मेंढेगाळी येथे ग्रामदेवता श्री कालिका देवीची सालाबादप्रमाणे वार्षिक यात्रा व तुळशी विवाह सोहळा मंगळवार, दि. 24 नोव्हेंबर 2026 रोजी मोठ्या भक्तिभावात आणि उत्साहात साजरा करण्यात येणार आहे. यानिमित्त दिवसभर विविध धार्मिक कार्यक्रम, देवीचा महाअभिषेक, ओटी भरणे, महाआरती, तुळशी विवाह, महाप्रसाद तसेच रात्रभर सोंगी भजन अशा कार्यक्रमांचे आयोजन श्री कालिकादेवी उत्सव कमिटीच्या वतीने करण्यात आले आहे.
यात्रेच्या प्रारंभी सकाळी 6 ते 7 या वेळेत श्री कालिका देवीचा विधिवत महाअभिषेक करण्यात येणार आहे. त्यानंतर दुपारी 1 ते 4 या वेळेत भाविकांसाठी देवीची ओटी भरण्याचा कार्यक्रम होणार आहे.
सायंकाळी 5 वाजता भजनी मंडळ व ग्रामस्थ मंडळी थळ देवस्थानाकडे प्रस्थान करणार असून, तेथील धार्मिक कार्यक्रम पूर्ण झाल्यानंतर पुढील कार्यक्रमांना सुरुवात होईल.
सायंकाळी 7 ते 8 या वेळेत श्री कालिका देवीची महाआरती होणार असून, रात्री 8 ते 9 या वेळेत पारंपरिक पद्धतीने तुळशी विवाह सोहळा संपन्न होणार आहे. रात्री 9 ते 10.30 या वेळेत सर्व भाविकांसाठी महाप्रसादाचे आयोजन करण्यात आले आहे.
यानंतर रात्री 10.30 ते पहाटे 5.30 या वेळेत कारलगा येथील श्री संत एकनाथ सोंगी भारुड भजनी मंडळाचा सोंगी भजनाचा विशेष कार्यक्रम होणार आहे. पहाटे 5.30 ते 6.30 या वेळेत काकड आरती होऊन त्यानंतर प्रसाद वाटप करण्यात येणार आहे. या धार्मिक कार्यक्रमाने यात्रेची सांगता होईल.
बुधवारी मराठमोळ्या लावणीचा विशेष कार्यक्रमयात्रेच्या दुसऱ्या दिवशी बुधवार, दि. 25 नोव्हेंबर 2026 रोजी रात्री 9 वाजता कोल्हापूर येथील दीपक कानडे प्रस्तुत “नटकट सुंदरा” ‘मस्त मराठमोळ्या लावणीचा शो’ आयोजित करण्यात आला आहे. या सांस्कृतिक कार्यक्रमामुळे यात्रेच्या उत्साहात आणखी भर पडणार असून, परिसरातील नागरिकांना मनोरंजनाची पर्वणी अनुभवता येणार आहे.
श्री कालिका देवीच्या यात्रेनिमित्त मेंढेगाळी गावात भक्तिमय आणि उत्साहपूर्ण वातावरण निर्माण होणार असून, गावातील ग्रामस्थांसह परिसरातील भाविक व माहेरवाशिणी, पाहुणे मंडळी आणि मित्रपरिवार मोठ्या संख्येने उपस्थित राहण्याची अपेक्षा आहे.
तरी मेंढेगाळी व परिसरातील सर्व ग्रामस्थ, भाविक, पाहुणे आणि मित्रमंडळींनी या धार्मिक व सांस्कृतिक सोहळ्याला आवर्जून उपस्थित राहून श्री कालिका देवीचे दर्शन घ्यावे, महाप्रसादाचा लाभ घ्यावा आणि कार्यक्रमांची शोभा वाढवावी, असे नम्र आवाहन श्री कालिकादेवी उत्सव कमिटी, मेंढेगाळी यांच्या वतीने करण्यात आले आहे.